O sábado, Castro y Los Escoltas
Ao día seguinte, na tarde do sábado 22, a Rebullón ofrece a actuación de Castro y Los Escoltas, xunto a Lie Detectors e Thee Blind Crows: un triplo concerto que dará comezo ás 18 horas con entradas desde 15 euros en anticipada, 18 en billeteira, á venda na cantina do CSCD As Pedriñas e tamén online.
Castro y Los Escoltas é o proxecto persoal do guitarrista Miguel Castro. Naceu no sur de Pontevedra durante o confinamento, coa idea de facer rock nun sentido amplo. Abrangue estilos desde rock clásico ata soul ou sons máis densos. Os seus compoñentes son veteranos no panorama galego (The pretty shirts, Gold&Colt, Pegas Negras). No 2023 lanzaron o seu primeiro traballo, “De nuevo a empezar", e actualmente están presentando o seu novo álbum, “Sinais”.
En segundo lugar, Lie Detectors levan case que unha década de traxectoria, partindo de Euskadi ata conquistar os garitos do resto do Estado e parte de Francia. Na súa paleta sónica hai pinceladas de rock&roll, garage, punk, hard e ata psicodelia, mesturados sen complexos. Con catro singles e un LP, todos esgotados, o ano pasado editaron un dobre sinxelo que vai polo mesmo camiño. Unha banda perfecta para aquelas persoas que lles move a rúa e o rock and roll.
E por último, o dúo pontevedrés Thee Blind Crows levará á Rebullón o seu directo explosivo e enérxico, feito de garage, punk e blues, un son único nacido no 2008. Desde entón, continúan editando discos e liberando enerxía en salas e festivais de media península. Co seu último traballo, “Thee Blind Crows 0823”, o grupo ofrece un cocktail 100% propio, con quince cancións e estilos que aglutinan o mellor da súa traxectoria: blues, punk, garage, folk, surf, country e instrumentais, vellas e novas colaboracións conxugadas para elaborar o disco máis extenso e ecléctico ata a data.
|
|
O domingo, teatro
A intensa fin de semana cultural na Rebullón remata o domingo coa representación da obra de teatro “Un estrambótico día”, a cargo de “La compañía espectacular”. A función do domingo comeza ás 17 horas con entrada por billeteira inversa.
A compañía vai presentar un traballo no que o teatro e a música bailan, coa seguinte sinopse. No teatro, ela está repasando o seu guión, el chega tarde compa sempre e o director non aparece. Mentres agardan, unha nube de pensamentos e confusión envolve aos protagonistas, ata que ocorre un xiro inesperado e comeza “Un estrambótico día”. A maxia cóase en escena e apodérase de todo. Buda e Catalina, os seus monicreques, deixan de ser simplemente obxectos manipulados e ofrecen a súa axuda para o novo guión. A música que cativa os nosos sentidos, o baile da liberdade, os contos inspiradores.
|
|
A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.
A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.
A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.
Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.
Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.
|
|
|
|
