A lenda do blues de Chicago, Johnny Burgin, este venres na Sala Rebullón xunto á Quique Gómez Band

A lenda do blues de Chicago, Johnny Burgin, este venres na Sala Rebullón xunto á Quique Gómez Band

Burgin é unha das figuras máis destacadas do blues de Chicago, un dos guitarristas máis respectados da súa xeración
Actúa este venres 21, ás 22 horas, desde 14 euros en anticipada, e compartindo escenario con Quique Gómez, con que gravou o aclamado disco conxunto “Dos Hombres Wanted”
E o sábado 22, ás 21:30 horas, a II Foliada “O Son da Rebullón”, xunto a O Son do Pazo, con BÖJ, Exquisitos Ghipes de Merda e foliada aberta ao remate!

Mos, 19 de febreiro de 2025.- Este venres, 21 de febreiro, o auténtico blues de Chicago vai encher a sala Rebullón, que recibe a un dos mellores guitarristas de blues dos Estados Unidos, Johnny Burgin, nun concerto único no que ademais compartirá escenario con Quique Gómez.

O concerto será este venres 21 de febreiro ás 22 horas, desde 14 euros en anticipada, ou 18 euros na billeteira, con entradas aínda á venda online ou na cantina do CSCD As Pedriñas, en Tameiga.

Johnny Burgin (vídeos) é unha das figuras máis destacadas do blues de Chicago. Coñecido polo seu estilo enérxico e auténtico, Burgin trae consigo toda a esencia do blues de Chicago que o consagrou como un dos guitarristas máis respectados da súa xeración. O músico estadounidense, cuxo talento e carisma no escenario lle gañaron o alcume de “Rockin’ Johnny”, presentará en directo algúns dos seus temas máis icónicos.

Burgin vén acompañado por Quique Gómez e a súa banda. Johnny e Quique levan anos colaborando desde que se coñeceron en 2010 no West Side de Chicago, nun concerto de Tail Dragger. En 2019 gravaron xuntos en Austin o álbum "Dos Hombres Wanted", editado polo selo Vizztone ese mesmo ano, aclamado por crítica e público, e presentado nunha extensa xira por Europa e EE. UU.

Esta colaboración promete unha noite chea de blues do máis alto nivel, que cautivará tanto aos amantes do xénero como a aqueles que desexan descubrir o auténtico son de Chicago en directo. Unha ocasión irrepetible de gozar dunha noite de blues inesquecible, con dous mestres xuntos.

Quique Gómez e Johnny Burgin

Johnny Burgin

Desde os seus orixes con Tail Dragger nos anos 90, Johnny converteuse nunha superfigura do blues nos EE. UU. e Europa.

Aprendeu dunha figura como Jimmie Lee Robinson e actuou cos mellores bluesmen de Chicago. The Rockin' Johnny Band foi unha das bandas máis activas e prestixiosas no Chicago dos anos 90. Despois, Burgin abandonou o circuito durante case unha década e en 2009 regresou para volver deixar a súa impronta co seu talento.

Con 12 álbums na súa carreira e a súa participación en gravacións de Jimmy Burns, Golden Big Wheeler, Little Arthur Duncan, Eddie Taylor Jr., Shirley Johnson e os citados Jimmie Lee e Tail Dragger, chega Johnny Burgin á Sala Rebullón, un incrible guitarrista de blues e fino cantante que mantén viva a chama do blues tradicional de Chicago.

BÖJ

O sábado, II Foliada “O Son da Rebullón”

Despois dunha grande primeira edición, O Son do Pazo e a Sala Rebullón reeditan a súa alianza e celebran este sábado 22, a partir das 21:30 horas, a II Foliada “O Son da Rebullón”.

O evento repite o modelo do ano pasado: concertos con foliada aberta para todos e todas ao remate. Actuarán este sábado BÖJ, unha banda da comarca de Ferrolterra que mestura tradicións galegas, asturiás, bretonas e irlandesas, cun toque de frescura e modernidade que os fai únicos. BÖJ presentará melodías e ritmos cheos de forza e emoción, perfectos para gozar en directo.

En segundo lugar, súmanse á festa os Exquisitos Ghipes de Merda, uns artistas moi singulares procedentes dos suburbios da Coruña, que veñen á Rebullón a facer vibrar ao público co seu son irreverente. A súa música é unha fusión de folk, rock progresivo e moita liberdade, unha viaxe sonora sen límites que non deixa a ninguén indiferente e fará vibrar ao público.

E ao remate dos dous concertos, foliada aberta para todo o público asistente! As entradas están á venda desde 10 euros en anticipada ou 12 euros o propio día da foliada, dispoñibles na cantina do CSCD As Pedriñas e no Pazo de Mos.

A sala Rebullón
Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.