Sun Iou, a última revelación do rock&roll en galego, presenta na Rebullón o seu segundo traballo: “Egos”

• Os de Teis (Vigo) –que debutaron hai dous anos con “Ágora”– dan un salto cualitativo cara a consolidación definitiva co seu novo disco

• O concerto de presentación de “Egos” será este sábado 21, ás 21 horas, desde só 10 euros, con Barbitúricos e DJ Bolachas

Mos, 18 de febreiro de 2026.- Con “Egos”, a banda viguesa Sun Iou logra confirmarse como a nova esperanza do rock&roll en galego, un traballo no que progresan tanto a nivel musical como lírico, un disco con espírito colectivo fronte a unha sociedade cada vez máis individualista.

Logo de saltar á escena hai dous anos con “Ágora”, o seu segundo disco ve por fin a luz e será presentado este sábado 21 na Sala Rebullón, ás 21 horas, con entradas desde 10 euros en anticipada –12 na billeteira–, á venda na propia cantina do CSCD As Pedriñas. Ademais, Sun Iou redondea a festa do sábado cos composteláns Barbitúricos e DJ Bolachas como artistas convidados.

“Egos” representa todo un salto adiante para Sun Iou. Musicalmente, a banda explora sons rock e punk combinados con voces femininas, gaitas e guitarreo; mentres que, a nivel conceptual, o disco foi concibido de forma coral, colectiva, como contraposición ao narcisismo e a individualidade que padece a sociedade.

Fronte a esta realidade, e como amosan tamén nos seus directos, o grupo pon o foco na comunidade e na forza do colectivo, unha resposta xurdida da beleza, a complicidade e a celebración colectiva. “Egos” fala de como as apariencias e a individualidade excesiva erosionan o vínculo social e a empatía, e cos seus oito artistas sobre o escenario, reivindican que cantar xuntas pode ser un acto político e afectivo.

Este sábado na Rebullón, Sun Iou amosará que a banda chegou para quedarse, cun espectáculo festivo, colectivo e vibrante para o público, que servirá de posta de largo do seu agardado segundo disco, “Egos”.

Xunto a Sun Iou estarán en Tameiga os composteláns Barbitúricos, “catro tipos especialistas en pechar bares e coñecedores dos mecanismos do punk-rock dende os tempos en que Joe Strummer fixo a primeira comunión”. A banda de punk rock e post punk fan gala de directos moi potentes e intensos para a audiencia.

Xurxo Pinheiro (Xenreira, Malandrómeda), Vituco Neira (ruxe ruxe, Malabesta), Fidel Vázquez (El último vicio) e Iago Jorge (Paulinha, ruxe ruxe) encarnan este proxecto cargado de calidade, elegancia sonora e bo gusto. Ademais agora nun formato medio acústico, medio eléctrico, levando aos escenarios as súas cancións atemporais, cargadas de lirismo maldito e melodías “máis pegañentas que unha bolsa de caramelos no peto dunha chaqueta ao sol”.

Xunto a Barbitúricos, pechará a xornada DJ Bolachas, facendo da noite do sábado unha festa coral ao mellor rock xestado en Galicia. O espectáculo, este sábado 21 na sala Rebullón, ás 21 horas, con entradas desde 10 euros en anticipada.

Que é Sun Iou?

Sun Iou é como se di “son eu” na variante do galego falado en Goián (Tomiño). O nome é unha reivindicación da esencia deste proxecto, nacido da man de tres amigos de Teis. As melodías e letras xurden primeiramente no imaxinario creativo de Tamara Martínez (voz e teclados), a música vai pasando pola peneira de Evaristo Alejos (baixo e voces) e, coas súas aportacións, van conformándose os temas. Mikele Fagá (guitarra, bases de batería), técnico de son no mítico estudio vigués dos 90 Sonoroterapia, deixouse conquistar pola proposta e sumouse ao dúo, dándolle un novo pulo e consolidando o proxecto con ilusión de futuro.

No verán de 2024, o trío convértese en octeto, sumando novos músicos á familia para poder levar a experiencia coral ao directo. Coa nova formación, Sun Iou son aínda máis paixón a autenticidade, máis compromiso, rebeldía e orixinalidade para o rock galego.

A sala Rebullón

Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.