Dúas lendas do rock local pisan este domingo a Rebullón: Hey Hematoma e Foggy Mental Breakdown

• Fundada por ex membros de Siniestro Total, Hey Hematoma rende homenaxe ao grupo e revive a esencia e os himnos da mítica banda

• Foggy Mental Breakdown é un referente do rock local e galego dos noventa, con Óscar Avendaño e Eladio Santos como membros orixinais

• Un evento irrepetible con dous titáns do noso rock nunha noite única: este domingo 7 de decembro ás 22:30 horas, desde só 12 euros

Mos, 3 de decembro de 2025.- Este domingo, a Sala Rebullón xunta sobre o escenario a algúns dos sospeitosos habituais do rock vigués e galego. Hey Hematoma e Foggy Mental Breakdown actúan este domingo 7 ás 22:30 horas, con entradas desde 12 euros en anticipada, 15 na billeteira, á venda na cantina do CSCD As Pedriñas e online.

Sen dúbida, o do domingo é un evento ineludible para os amantes do rock máis auténtico e con raíces na nosa terra, un encontro para gozar con temas que xa son historia da nosa música e facer vibrar á fibra máis nostálxica do público galego.

Creado o ano pasado, HEY HEMATOMA é o proxecto promovido por integrantes orixinais de Siniestro Total para manter vivo o legado do icónico grupo vigués. A banda foi impulsada por Miguel Costas, Javier Soto e Andrés Cunha, e completada con Alberto Cunha e Chus Dasilva, co obxectivo de recuperar a esencia do grupo orixinal e recuperar para o directo as cancións máis icónicas de Siniestro.

Na Rebullón seguramente soarán clásicos como “Bailaré sobre tu tumba”, “Miña terra galega”, “¿Quiénes somos? ¿De dónde venimos? ¿A dónde vamos?” o “Camino de la cama”, entre moitos outros, das mans e da voz de tres membros orixinais de “Siniestro”.

Hey Hematoma asegura ao seu público unha experiencia única en directo, un verdadeiro revival para os nostálxicos da “movida viguesa” e unha homenaxe inmellorable ao grupo máis influínte do punk-rock que xurdíu en todo o estado: Siniestro Total!

E para redondear a noite, o domingo tamén visita a Rebullón FOGGY MENTAL BREAKDOWN, outro nome que resoa con peso propio na escena rock local dos anos noventa. O grupo –que debe o seu nome á canción de Steppenwolf, a banda coñecida polo seu famosísimo “Born to be wild”– regresou o pasado ano aos escenarios con nomes ben coñecidos á batuta, como Eladio Santos ou Óscar Avendaño, entre moitos outros.

A nivel de estilo musical, Foggy Mental Breakdown aposta por un hard rock clásico con toques de garage e psicodelia, o que, xunto a composicións como “Melvin the Eater”, converteunos nunha das formacións estrela da época.

O ano pasado, os seus integrantes decidiron revivir esta banda icónica pola que pasaron tantos músicos que logo fixeron carreira na música, unha banda que ademais foi berce de moitos outros proxectos e que acolleu ao mellor do mellor da escena underground da área de Vigo.

En definitiva, unha noite de domingo moi festiva para animar a ponte de Decembro na Sala Rebullón, para gozar e honrar ao mellor rock galego dos noventa. Para que os que peitean canas revivan a banda sonora da súa mocidade e para que as novas xeracións coñezan e aprecien o camiño aberto polos precursores.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.