The Brooklyn Gorillas: Experiencia, calidade e moito Rock&Roll para conquistar o escenario dos solpores.

Os Solpores da Rebullón volve unha semana máis cunha nova cita cultural, apostando pola música en directo, as artistas locais e o encontro comunitario.
The Brooklyn Gorillas presentará algúns dos seus novos temas gravados no estudio Escusalla Sonora.

Mos, 13 de agosto de 2025.-

O ciclo cultural Os Solpores da Rebullón continua cunha nova aposta por bandas emerxentes no mes de agosto e cun público cada vez máis fiel que ven disfrutar da boa música e do bo ambiente sobre o escenario exterior do CSCD As Pedriñas (Tameiga, Mos). Despois dun intenso comezo de mes no que nos visitaron Three Soul, Quique Gómez & Curro Serrano e Anxo Araújo, afrontamos o mes coas tres últimas citas dos solpores deste ano.

The Brooklyn Gorillas é unha banda de rock & roll formada recentemente, no 2024, por músicos cunha longa traxectoria na escena galega. O seu debut en directo tivo lugar o 3 de xaneiro de 2025, compartindo cartel coa banda viguesa Nando & The Werewolves na sala La Fábrica de Chocolate Club (Vigo). A medida que os días se fan máis curtos, adiantamos a hora dos concertos para que sigamos disfrutando de música ao solpor, polo que non vos perdades este xoves 14 de agosto o concerto ás 20:30h.

Con esta iniciativa, Os Solpores da Rebullón continuan consolidándose en agosto como unha cita imprescindible do verán na comarca, apostando pola cultura de proximidade, a música en directo e os encontros comunitarios.

THE BROOKLYN GORILLAS

Actualmente o grupo está en pleno proceso de sacar á luz a súa primeira gravación de estudio, despois dunha fase de composición de repertorio orixinal e de pasar no mes de abril polo estudio Escusalla Sonora, dirixido polo produtor Javier Vicalo.

Con este proxecto buscan non só desenvolver unha proposta musical sólida, senón tamén dar visibilidade á banda a través de redes sociais e plataformas dixitais, iniciando unha campaña de promoción independente.

Ademais, afirman querer participar activamente no panorama cultural galego. A súa inscrición no catálogo de bandas da provincia de Pontevedra nace do compromiso coa cultura de base e a convicción de que a música pode ser unha ferramenta para fortalecer o tecido social. A banda aposta firmemente pola labor das asociacións veciñais e sen ánimo de lucro, polo que están interesados en colaborar en iniciativas culturais que promovan o acceso á música en comunidades con menor oferta cultural.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Este ano volveu a alzarse co Premio Martín Códax da Música 2025 á mellor sala de concertos, segundo a votación dos socios e socias de Músicas ao Vivo, recoñecemento que xa ganara no 2023.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.