Por último, a do sábado será unha noite adicada aos son máis escuros e contundentes do metal na Rebullón. Os portugueses Living Tales + DisonanT + Akelarre, este sábado 6, ás 21:30 h, desde 10 euros, á venda na cantina do CSCD As Pedriñas. 

 

Living Tales é unha banda portuguesa de metal progresivo e sinfónico con preto de vinte anos de traxectoria e un son propio que combina arranxos orquestrais e a potencia do metal. Os lusos contan con catro álbums de estudio no mercado, comezando co seu debut Delusional Mind en 2012. Tras o lanzamento de Mirror e a boa acollida de Persephone en 2022, a banda acadou a súa madurez creativa co seu traballo máis recente, Hades, publicado en abril de 2025. O concerto da Rebullón forma parte da xira de presentación dos seus novos temas, confirmando o seu gran momento sobre os escenarios. 

 

Xunto aos portugueses, dous grupos galegos para completar unha noite de puro metal contundente. Aquelarre é unha banda nada en Vigo que se caracteriza polo seu power core, unha mestura entre a potencia do metalcore e a melodía do power metal. A súa traxectoria profesional comezou co lanzamento de "Requiescat in Pace" (2014), seguido por "Tempo" (2016), co que realizaron máis de 40 concertos por España, e "Suevia" (2019), onde exploraron un son máis agresivo e moderno. No 2024, editaron o seu último traballo ata a data, "Versus", un proxecto ambicioso producido que se divide en catro EPs.

 

Pola súa banda, DisonanT formouse no 2023 cun estilo moi persoal, agresivo, cunhas letras que ofrecen un retrato crítico dun sistema que consideran decadente e desapiadado. A incorporación no 2024 do guitarrista Alfonso Pérez consolidou un son máis complexo e poderoso, co que a banda busca establecerse como un referente dentro da escena metal. Cun enfoque baseado na paixón e na dedicación, DisonanT convida ao público a romper coa rutina e loitar polos seus obxectivos máis ambiciosos.

Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.  

 

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa  versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

 

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.  

 

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

 

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.