O sábado, Clock & Rock Fest
Ao día seguinte, unha xornada co mellor rock e metal underground local. O Clock & Roll Fest nace coa firme vocación de ofrecer unha noite musical vibrante, de calidade e variedade, con catro grupos esenciais na escena. O festival, este sábado 11 desde as 19:30 h, con entradas a 18 € en anticipada (25 euros en billeteira) á venda online e nas tendas Discos Elepé, bar Revolver e Honki Tonk.
Os vigueses Stoned At Pompeii redefinen o rock cun son moderno e internacional que lles levou a escenarios europeos e festivais como o Resurrection Fest. O seu álbum “Blissphony”, producido polo nomeado ao Grammy Robin Schmidt, foi nomeado a Mellor Álbum de Rock nos Premios da Academia da Música de España 2025. Destacan por un directo potente que combina enerxía e unha posta en escena de primeiro nivel.
Mano de Piedra leva unha década de son cru, pesado e distorsionado, mestura de stoner, hardcore, metal e crust. O seu álbum Today’s Ashes (2019) recibiu múltiples galardóns, incluíndo o de mellor álbum do ano en diversos medios especializados. Na Rebullón, farán gala da intensidade que caracteriza os seus directos.
Pola súa banda, Luciférnaga encapsula a esencia do doom e o stoner metal. Formada por músicos con máis de 20 anos de experiencia en bandas como Mano de Piedra ou The Mirage, a súa proposta é un "ritual sonoro" que explora a escuridade do ser humano. A súa música caracterízase por riffs pesados e envolventes acompañados de letras introspectivas e un pesimismo poético.
Por último, Blue Merrow chega de Pontevedra cunha proposta de creación e interpretación musical baseada na interpretación, un son con influencias de finais dos anos sesenta e inicios dos setenta e melodías de blues con acentos de hard rock clásico. Publicaron o seu primeiro traballo no 2022 e agora contan cun novo EP, “Navagio”.
|
|
|
|
|
|
|
E o domingo, Lluís Sánchez + Montedapena
A fin de semana conclúe coa chegada á Rebullón da voz pop do momento en Catalunya, Lluís Sánchez, xunto a Montedapena como artista convidado. A dobre actuación será este domingo 12, a partir das 18:30 h, con entradas a 11 € en anticipada (12 na billeteira), á venda online e na cantina do CSCD As Pedriñas.
Lluís Sánchez foi o gañador da terceira tempada do talent show de máxima audiencia en Cataluña, Eufòria. Tras o éxito do seu hit estival “Els millors dels nostres dies” —canción do verán de TV3 e Catalunya Ràdio—, o 2025 foi un ano de despegue, con nova música e e unha xira chea de enerxía e emoción, compartindo escenario con artistas de referencia.
Este ano, Lluís Sánchez presenta un directo renovado coa banda, que cativa os corazóns do público e converte cada concerto nunha celebración da música e da súa traxectoria como unha das voces emerxentes máis prometedoras da escena. O concerto celébrase grazas ao circuíto Girando por Salas do INAEM e contará con Montedapena como artista convidado.
Montedapena é o proxecto musical persoal de Héctor Rodríguez, artista moañés coñecido por ser membro da banda Lontreira. Fusiona pop con electrónica e ritmos bailables, sen etiquetas, con ironía e emoción, logrando reflectir o sentir da súa xeración. Debutou o ano pasado cun traballo ben recibido e agora vén de lanzar un sinxelo de avance do seu novo EP, “Me tiré a un facha”.
|
|
|
|
|
Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.
A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.
Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.
Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.
|
|
