Este sábado, dous concertos de balde na sala Rebullón: os suecos Children of the Sün e a festa aniversario de Os Carunchos

• Ás 13 horas, o grupo sueco presentará o seu son poderoso e atemporal, unha exitosa fusión de rock, blues e folk

• E ás 21 horas, Os Carunchos ofrecerán un concerto especial para pechar a xira do 30º aniversario, con sorpresas e convidados

Mos, 5 de febreiro de 2025.- Este sábado, 8 de febreiro, a sala Rebullón acolle unha dobre cita imperdible para o público máis musical, e con acceso de balde: ás 13 horas, os sons clásicos e atemporais de Children of the Sün e, a partir das 21 horas, concerto especial de Os Carunchos para celebrar o seu trixésimo aniversario.

Chegados desde Suecia, Children of the Sün ofrece unha experiencia musical atemporal grazas ao seu son poderoso que fusiona rock, blues e folk. A banda mistura harmonías clásicas e riffs apaixoantes, lixeireza e profundidade, unha homenaxe ao rock que fai recordar por momentos a grupos como Fleetwood Mac, Ghost ou incluso ABBA.

Children of the Sün (vídeos) acadou un importante impacto no seu país natal grazas á súa actuación no Sweden Rock Festival e ao seu disco “Roots”, de 2022, sendo incluso mencionado por publicacións de prestixio como a Rolling Stone. Ademais, o seu tema “Leaves” logrou colarse entre as cinco primeiras na lista Aftonbladet das mellores cancións de rock do ano.

Este sábado, desde as 13 horas, o grupo vai presentar as súas novas composicións, xa que Children of the Sün acaba de publicar hai menos dun mes o seu novo traballo, “Leaving Ground, Greet the End”, chamado a consolidalos na escena internacional.

Segundo anunciaron nas súas redes, este concerto é de balde como agasallo da Rebullón e da promotora Lestrato Rock, pola fidelidade do público á sala e polo seu compromiso coa música en directo e co proxecto da Rebullón. Ademais, a cantina das Pedriñas ofrecerá racións a prezos populares para repoñer forzas tras o concerto.

Children of the Sün

Os Carunchos
O mesmo sábado 8, a partir das 21 horas, Os Carunchos van subir ao escenario da Rebullón para agasallarnos cun espectáculo moi especial: o concerto co que clausuran a xira do 30º aniversario do grupo. A cita promete ser inesquecible, unha foliada rachada chea de sorpresas e colaboracións especiais.

O grupo leva trinta anos convertendo a música nunha auténtica festa. Naceron coa idea de misturar temas cantados con repertorio de gaiteiros salistas, conseguindo unha formación nova e orixinal que os levou a participar nos festivais folk máis importantes de Galicia.

Os Carunchos misturan e recuperan coplas do imaxinario popular e poñen música ás obras de poetas históricos e contemporáneos. A súa música inclúe gaita solista, percusión variada, polifonía vocal e o acompañamento da zanfona, todos os ingredientes para facer das súas actuacións auténticas festas cheas de enerxía e diversión.

WhatsApp_Image_2024-11-21_at_11.07.54.jpeg

Os Carunchos

A sala Rebullón
Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.