O salmantino Kike M, expoñente do novo rock de autor, este domingo na Sala Rebullón

• Con Sheila Patricia como convidada, o salmantino presentará o rock urbano de raíz que lle valeu dúas nominacións aos Premios da Academia da Música de España

• Este sábado, regresa forte o MoskaRock, con Barracüda, Eskravos, Skadelos, Sustanciados, The Eskarallas, DJ Jack Fabr e DJ Jenni Riveiro

• O venres ás 19 h, o MoskaTEK, un novo festival de electrónica con once DJ e doce horas consecutivas de música, desde só cinco euros

Mos, 15 de abril de 2026.- Este domingo, a Rebullón ofrece a posibilidade de descubrir a un artista en plena expansión creativa. Kike M é un dos nomes máis sólidos do novo rock urbano de raíz e actuará na Rebullón da man do programa Girando por Salas do INAEM, con Sheila Patricia como artista convidada.

O concerto terá lugar este domingo 19 ás 18:30 horas desde só 7 € en anticipada (10 € en billeteira) á venda online e na cantina do CSCD As Pedriñas.

Con só dous traballos editados, o salmantino gañouse un lugar na primeira liña do novo rock de autor no Estado, nomeado a dous Premios da Academia da Música de España nas categorías de Mellor Álbum e Mellor Canción de Rock.

Despois de varios anos como integrante de diversas bandas, Kike M lanzou en 2021 o seu primeiro álbum, “Antipersonal”, dez cancións editadas en formato fanzine e para o que contou coa colaboración de artistas como El Kanka ou Rulo. Con este primeiro álbum foi recoñecido como artista revelación pola Revista La Heavy e a web referencial do xénero Mariskalrock.com. Ademais tamén foi premiado, entre outros, no Certame de Mozos Creadores de Salamanca e o Certame Arte Nova Castela e León.

O seu segundo disco, “Cantares de Arcilla”, baixo a batuta do lendario músico e produtor Iñaki “Uoho” Antón (Platero y Tú, Extremoduro, Marea...), foi o éxito que lle permitiu dar o salto que apuntaba. O propio Kike M fíxose cargo da identidade visual de “Cantares de Arcilla”, modelando por cada canción unha escultura que representa un animal mitolóxico do bordado tradicional da serra de Francia (Salamanca).

Tras máis de 50 datas de xira, incluíndo festivais como o Festival de la Luz ou Sonorama Ribera, o artista adapta a súa proposta a un formato íntimo pero enerxético, fusionando folk rock con letras honestas e melodías coreables. En directo, Kike M, coa súa potente banda, é un despregamento de enerxía que se contaxia na primeira escoita.

E ademais, por se o plan non fora suficiente, o concerto de domingo contará con Sheila Patricia como artista convidada. A galega está inmersa nunha nova etapa de volta ao esencial con “Epifanía”, un disco co acústico no centro: a guitarra, a voz e esa maneira tan súa de contar a nivel interpretativo. En directo, Sheila Patricia mesturará repertorio novo coas pezas que fiaron a súa traxectoria.

O Moska Rock crece

Antes, a Rebullón acolle esta fin de semana a cuarta edición do MoSka Rock, o festival de música ska e punk en Mos, que este ano dá un paso adiante con dúas xornadas de música e carpa exterior.

O día grande será este sábado desde as 18 horas. O Moska Rock programa cinco grandes bandas na Sala Rebullón: Barracüda, Eskravos, Skadelos, Sustanciados e The Eskarallas. Entre os concertos, a festa trasládase á carpa exterior onde continúan o espectáculo cos sets de DJ Jack Fabr e DJ Jenni Riveiro. As entradas para o sábado están xa á venda online desde 18 euros en anticipada, ou 23 na billeteira.

A banda madrileña Barracüda destaca pola súa madurez compositiva e unha potente posta en escena que os levou a compartir escenario con bandas icónicas do rock español e a recibir excelentes críticas de medios internacionais. O grupo punk rock The Eskarallas, consolidados na escena cos seus directos potentes, chegan á Rebullón con novo material e nova xira “Con Satán Tour”, coa que visitarán España e Europa nos anos 2026 e 2027.

Formado no 2019, Sustanciados sobresae pola potencia dos seus directos e unha traxectoria ao alza. Agora lanza este ano novo traballo, “Sustancia2”, co que o grupo se consolida na escena actual mantendo a súa esencia colaborativa e enérxica. Pola súa banda, Eskravos chegan ao Moska Rock desde A Estrada coa súa descarga de hardcore punk combativo, letras afiladas e unha posta en escena directa intensa que non dá tregua. Pola último, Skadelos aposta desde O Carballiño por un ska enerxético e festivo, cheo de crítica social e ritmos bailables, que converte cada concerto nunha celebración colectiva.

E como un día quedaba algo curto, a organización do evento decidiu sumar forzas coa escola de música MezclaMos Música, que imparte as clases de formación de Dj's na Sala Rebullón, para crear o MoskaTEK, un novo festival de música electrónica de doce horas de duración, once DJs, na carpa exterior da sala Rebullón. O venres 17, desde as 19 horas, desde só 5 euros á venda na billeteira.

A sala Rebullón

Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.