XI Festival Aluméame: oito grupos e quilos de solidariedade en favor das familias de Mos que o precisan

• Celébrase este domingo 25 ás 17 horas, con oito artistas na Rebullón e entrada coa entrega dun quilo de comida non perecedoira

• Teatro, música e baile para todos os públicos: Grupo de Teatro Éche o que hai, Escolas Tangaraño, Cé Orquestra Pantasma, Avelurio, Las Pamisuki, Son de Abrente, Ondiñas do Mendo e Cantaruxas

Mos, 20 de xaneiro de 2026.- A solidariedade regresa un ano máis a Tameiga. O Festival Aluméame regresa á Sala Rebullón este domingo 25, desde as 17:00 horas, unindo teatro, música e baile por unha boa causa: recadar e entregar alimentos ás familias de Mos que máis o precisan.

O evento –organizado pola Asociación Cultural Tangaraño co apoio de Mos Axuda e a Comunidade de Montes de Tameiga– reúne este domingo a oito artistas sobre o escenario, con prezo simbólico de entrada de, mínimo, un quilo de alimentos non perecedoiros. E para quen non poida asistir e desexe colaborar coa causa, xa é se pode depositar a súa doazón de comida nun espazo habilitado no CSCD As Pedriñas.

O público que asista ao festival gozará dunha tarde coa mellor cultura galega. O Grupo de Teatro Éche o que hai achegará o humor e a reflexión propios do teatro popular, mentres que as Escolas Tangaraño exhibirán o traballo de formación en baile e música tradicional que desenvolve a asociación, centrado en transmitir costumes, convivencia e respecto pola cultura galega. A presenza de Cé Orquestra Pantasma, proxecto unipersoal recoñecido polos seus directos cheos de xogo, participación e música para todas as idades, reforza o carácter festivo e inclusivo da xornada.

Completan o cartel Avelurio, Las Pamisuky, Son do Abrente, Ondiñas do Mendo e Cantaruxas, grupos vencellados á música e o baile de raíz, que contribúen a poñer en valor o patrimonio inmaterial galego e o traballo continuado das asociacións culturais da comarca.

En definitiva, unha tarde de domingo para presenciar unha boa mostra da nosa cultura, pasar unhas boas horas en boa compañía e apoiar ás familias do municipio que máis o necesitan. O XI Festival Aluméame, este domingo 25, ás 17 horas, na Sala Rebullón.

O sábado 24, teatro aberto

O día antes, unha oportunidade para ver en primicia unha obra de teatro en construcción. Trátase de “Apego”, unha mostra aberta do proceso de creación da obra, aínda non rematada pola compañía.

Será este sábado 24 desde as 19 horas, con entrada por billeteira inversa. Tres persoas nun metro pretenden explicarlle ao público como ter relacións sas poñéndo en evidencia todos os seus medos e contradicións. Entre raves, touros e exceso de análise, aparecen o apego ansioso, o evitativo e toda esa teoría coa que tentamos explicar o inexplicable.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.