Antes, a sala Rebullón acollerá un concerto moi diferente, pero igual calidade. O sábado, Emilia y Pablo ofrecerán a súa música íntima e sensorial, mestura do folclore latinoamericano co flamenco. Actuarán este sábado 30, ás 22:30 horas, con entradas desde 10 € en anticipada (13 € na billeteira) á venda online e na cantina do CSCD As Pedriñas. 

 

Emilia y Pablo é un dúo chileno afincado en Madrid que combina a súa experiencia nas artes escénicas cunha mestura única de folclore latinoamericano e flamenco, creando un soño intimista e, ao tempo, poderoso. O seu repertorio acolle influencias como o joropo, o bolero, a chacarera ou os cantos andinos, sempre axitados por aires aflamencados, que lles valeu o recoñecemento da crítica como “a nova gran promesa da canción en Madrid”. 

 

Esta fusión atópase no corazón do seu proxecto, xurdindo como unha proposta sonora e poética que busca o silencio, o misterio e a emoción acoutada máis que o estribillo fácil. O seu primeiro álbum, Territorio de Delirio (2021), inclúe un conxunto de colaboracións de luxo, como Niño de Elche, Martín Bruhn e Diego Galaz, e convive á sombra de mestres como Mercedes Sosa, Violeta Parra, Quilapayún ou Caetano Veloso, pero traducidos a unha voz propia. 

 

No 2019, Emilia y Pablo gañaron o primeiro premio do concurso de Jóvenes Creadores do Concello de Madrid, foron finalistas na plataforma Acústic e actuaron como teloneros de nomes como Estrella Morente, Diego El Cigala ou José Mercé. No 2021 participaron no ciclo Jazz no Palacio Real de Madrid, abrindo o concerto inaugural de Silvana Estrada. 

 

Quen se achegue á Rebullón o sabado gozará da oportunidade de descubrir unha proposta pouco convencional, profundamente humana, onde a canción actúa de ponte a unha experiencia íntima e de gran calidade. 

Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.  

 

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa  versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

 

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.  

 

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

 

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.