A xira 40º aniversario de Potato, pioneiros do ska e do reggae en España, fai parada este sábado na Rebullón

• Os de Vitoria-Gasteiz, que ademais chegan con novo traballo, “Todavía hay quien resiste”, actúan este sábado 28 ás 20:30 horas desde12 €

• Xunto a Potato, o sábado presentará novo disco Loita Amada, o último proxecto de Jásper, voz esencial da canción protesta galega

Mos, 25 de febreiro de 2026.- A mítica banda Potato desembarca este sábado na Rebullón xunto aos galegos Loita Amada, unha noite de reggae, ska, punk e rock festivo e reinvidicativo, este sábado 28 a partir das 20:30 horas, con entradas a 12 euros á venda online e na cantina do CSCD As Pedriñas.

Potato é unha banda histórica e de referencia por méritos propios, que xurdiu a mediados dos oitenta reivindicando o “Euskadi tropical”, unha divertida e anárquica alternativa ao punki radical encarnado por formacións como Eskorbuto, Kortatu ou La Polla Records.

Pioneiro do ska-reggae en España, o grupo leva catro décadas rubricando cancións combativas cun son xa lendario, mantendo sempre intacto o seu espírito irreverente e festivo. Así o amosan no seu último traballo, cun título que resume case que a súa actitude vital, “Todavía hay quien resiste”, co que están a xirar por salas míticas da península, como a Copernico de Madrid ou a Razzmatazz de Barcelona.

Ata este novo traballo, a banda abriu no Estado un camiño percorrido logo por outras bandas. Cunha decena de discos editados e centos de concertos por toda a xeografía, con temas convertidos en himnos como “Miguelín el Cashero”, “Rula”, “Jamaika Ska” ou “Derroche”, da que fixeron unha regravación especial polo aniversario.

Completando o cartel do sábado na Rebullón estará Loita Amada, o proxecto liderado por Jásper tras unha longa traxectoria en bandas de referencia como Xenreira, A Matraka Perversa ou NAO. Nacida da canción protesta galega, Loita Amada propón un son actual que leva esa tradición cara a novas sonoridades, cun directo intenso que é ao tempo berro de resistencia e chamada á acción.

O grupo presenta o seu terceiro disco, “Resistir é vencer”, once cortes nos que plasma a súa poesía revolucionaria sobre unha base de rock duro con variadas influencias como punk, folk, metal, reggae, ska, pop, tradicional... A temática tratada vai desde a pasividade de Europa fronte ao xenocidio do pobo palestino e a impotencia experimentada no activismo político e musical, ata a dignificación do legado dos nosos avós e avoas, sempre deixando espazo para o amor.

O novo disco de Loita Amada contou con colaboracións artísticas de luxo: Nuno Pico (Grande Amore), «o da Gándara», Hartiz Zabaleta (Ameba), Luken Arkarazo (Odolaren Mintzoa), Mini Rivas (Fuxan os ventos), Xiana Lastra (A banda da loba), Vituco Neira (RuxeRuxe), Tanxugueiras e o trikitilari Joseba Tapia.

O concerto do sábado de Potato e Loita Amada converte á Sala Rebullón nun lugar de encontro entre xeracións e xeografías unidas por música tan divertida como combativa. O público poderá gozar dunha noite na que se dan a man o legado pioneiro do reggae e o ska en España e a nova vaga da música galega de carácter reivindicativo.

A sala Rebullón

Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Desde entón, alzouse con dous premios Martín Códax da Música á mellor sala de concertos, no 2023 e no 2025, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga

A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.