Segunda cita da semana para comezar agosto de solpores con moita música. Turno para Quique Gómez & Curro Serrano.

Os Solpores da Rebullón estrean agosto cunha semana na que presentan tres citas culturais, promovendo a música en directo, artistas locais e o encontro comunitario.
Quique Gómez & Curro Serrano presentan VOL.1 no escenario dos solpores da rebullón.

Mos, 6 de agosto de 2025.-

O ciclo cultural Os Solpores da Rebullón continua a estrea do mes de agosto cunha semana chea de música e bo ambiente sobre o escenario exterior do CSCD As Pedriñas (Tameiga, Mos). Despois do éxito de Three Soul, continuamos a pola segunda cita semanal coa música ao vivo nun entorno natural e familiar.

Quique Gómez & Curro Serrano subirán ao escenario dos solpores para presentar un proxecto con moita traxectoria que aposta pola música sen posproduccións nin trucos. Non vos perdades este mércores 6 de agosto ás 21h un concerto dun dúo que levan facendo música xuntos dende o instituto.

Con esta iniciativa, Os Solpores da Rebullón comezan agosto consolidándose como unha cita imprescindible do verán na comarca, apostando pola cultura de proximidade, a música en directo e os encontros comunitarios.

QUIQUE GÓMEZ & CURRO SERRANO

A súa historia común comeza nos tempos de instituto, onde naceron as primeiras colaboracións musicais. Daquela amizade xorde a banda Juan Bourbon, Juan Scotch & Juan Beer, coa que publicaron dous discos e ofreceron máis de mil concertos ao longo de doce anos, consolidándose como unha referencia do blues en España.

Tras a disolución da banda, Quique e Curro continuaron tocando xuntos en formato acústico de xeito puntual. Non sería ata 2017 cando decidiron apostar con forza polo proxecto e gravar o seu primeiro disco como dúo:
"Quique Gómez & Curro Serrano VOL.1", un traballo gravado en directo cun só micrófono nos estudos Funkameba, sen artificios nin posproducións, que rende homenaxe ao blues e ás músicas tradicionais norteamericanas das décadas de 1920 a 1950.

No escenario, Quique Gómez —con voz, harmónica, guitarra e mandolina— e Curro Serrano —con guitarra acústica, dobro e guitarra de 12 cordas— ofrecen un espectáculo que nos transporta directamente aos Estados Unidos da primeira metade do século XX, coa forza e honestidade dunha música que foi semente das grandes sonoridades do século pasado.

Quique Gómez conta cunha sólida carreira internacional, máis de 10 discos editados e colaboracións con lendas do blues como John Primer, Eddie C. Campbell, Bob Stroger, Jimmy Burns ou Rockin Johnny. Pola súa banda, Curro Serrano tamén compartiu escenario con nomes como Buddy Miles ou Paul Orta, e actualmente forma parte do quinteto Quique Gómez & His Vipers.

Un concerto íntimo, auténtico e cargado de historia musical, perfecto para deixarse levar polos sons do blues mentres o sol se deita na Rebullón.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Este ano volveu a alzarse co Premio Martín Códax da Música 2025 á mellor sala de concertos, segundo a votación dos socios e socias de Músicas ao Vivo, recoñecemento que xa ganara no 2023.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.