OMIRI, a nova sensación da música portuguesa, este sábado na Rebullón

• Actúa o sábado 15, ás 22 horas, desde só 10 € en anticipada, cun espectáculo que combina a electrónica co folklore portugués

• OMIRI é a reinvención da música tradicional lusa, que chega á Rebullón con MJ Pérez e DJ Gaiteirinho como artistas convidados

• Este venres 14, ás 22 h, “minifestival” de talento galego, con Antón Ke, Michu & Pacheco, Zeltia Irevire e Xenderal, desde 12 €

Mos, 12 de febreiro de 2025.- O sábado, 15 de febreiro, a sala Rebullón acolle o agardado concerto da nova sensación da música portuguesa. OMIRI, o innovador proxecto do músico portugués Vasco Ribeiro Casais, desembarca en Tameiga coa súa singular mistura de tradición portuguesa e electrónica, que ademais presenta nun espectacular show multimedia.

A actuación de OMIRI na Rebullón será este sábado 15 ás 22 horas, con entradas desde 10 euros en venda anticipada, máis gastos de xestión, ou 14 na billeteira. Ademais de OMIRI, o público tamén poderá gozar o sábado de dous artistas convidados: a cantautora e produtora MJ Pérez e o portugués DJ Gaiteirinho, que promete facer bailar cos seus ritmos folk e world music.

Nos seus sete anos de traxectoria cultural, OMIRI posiblemente foi o espectáculo que máis sorprendeu ao público da Rebullón, pola súa fusión única de tradición portuguesa con bases electrónicas urbanas e actuais. Así, elogo do exitoso concerto do pasado ano, OMIRI regresa a Tameiga e con novidades.

Este sábado, OMIRI vai presentar o seu novo traballo, “Modas Novas e Algumas Velhas”, no que afonda na reinvención da rica tradición músical portuguesa coa que está a causar sensación. De feito, o seu xa é un proxecto internacional, que presentou en festivais como o Womex, Reeperbahn, Eurosonic, Rudolstadt, Kaustinen, Viljandi, Dranouter, Live at Heart, Exib Música, Iminente, WestWay Lab, Med e Artes á Rúa, entre outros.

Outro dos elementos salientables da proposta cultural de OMIRI é o seu espectáculo, totalmente innovador, no que incorpora gravacións vídeos e sons que se misturan co actuación, ata crear unha atmósfera única.

Omiri

Este venres, “minifestival” galego
Xunto ás propostas singulares chegadas de fóra das nosas fronteiras, a Rebullón caracterízase pola respaldar o talento emerxente galego. O espectáculo deste venres é un bo exemplo: unha noite con catro artistas do noso país sobre o escenario.

Este venres 14, desde ás 22 horas, por 12 euros en anticipada (á venta na cantina do CSCD As Pedriñas, en Tameiga), ou 15 na billeteira, o público que acuda á sala poderá presenciar os concertos de Antón Ke, Michu & Pacheco (Michu da Rocha), Zeltia Irevire e Xenderal.

En primeiro lugar, Antón Ke é ukelele de batea, ritmos furancheiros e letras retranqueiras que mesturan blues, reggae, hip hop e tradición galega. Un espectáculo único onde a reivindicación, a nosa cultura e o humor toman o protagonismo. En segundo lugar, a actuación acústica de Michu & Pacheco (Michu da Rocha) trae harmonías coidadas e ritmos pegadizos que farán bailar a toda a sala. Letras cargadas de humor, enerxía e boa onda nun estilo onde o moderno e o vintage mestúranse con naturalidade.

En terceiro lugar, o “folk tribal” de Zeltia Irevire vai transportar ao público a outra dimensión, cunha combinación máxica de instrumentos acústicos e electrónicos. Letras que reivindican a sabedoría popular e a defensa do patrimonio cultural e natural de Galicia. Por último, Xenderal, a raiba galega feita música. Letras contundentes e retranqueiras ao ritmo de ragga e beatbox. Un auténtico activista cultural que rebenta os escenarios con lírica xamaicana e unha enerxía inigualable.

Zeltia Irevire

A sala Rebullón
Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.