Rock alternativo, moderno e da rúa: Froján chega aos Solpores da Rebullón

Rock alternativo, moderno e da rúa: Froján chega aos Solpores da Rebullón

Os de Pontevedra actúan no exterior do CSCD As Pedriñas este xoves, 8 de agosto, ás 21 horas, con billeteira inversa

Froján presentará en Tameiga cancións do seu último disco, “Reflejos”, producido polo guitarrista da mítica banda Marea

Mos, 6 de agosto de 2024.- Unha nova data para as e os amantes da boa música ao aire libre. Os Solpores da Rebullón, ciclo organizado pola Comunidade de Montes de Tameiga no exterior do centro sociocultural As Pedriñas, programa para este xoves, 8 de agosto, ás 21 horas, o rock alternativo de Froján.

Definida como “a banda que captura a esencia do rock de rúa moderno”, Froján subirá ao escenario dos Solpores da Rebullón para presentar os temas do seu segundo e novo traballo, “Reflejos”, producido por Kolibri Díaz (guitarrista en Marea) e gravado nos “Estudios R5” de Pamplona.

Asentados na cidade de Pontevedra, os compoñentes do grupo ofrecen unha perfecta mistura de rock e poesía. Froján presta unha especial atención e coidado ás letras das súas cancións, influenciadas por Kutxi Romero e Robe Iniesta, combinadas co rock alternativo como base. O grupo conseguiu crear un estilo propio son fusionando detalles barrocos e clásicos co son das bandas referentes do rock estatal.

Desde os seus inicios, no 2020, Froján tocou en salas como La Fábrica de Chocolate (Vigo), a Filomatic (A Coruña) ou o Elefante Blanco (Madrid), entre outras, e participaron en festivais como o Bandeira Rock (Silleda) ou o Cultura Quente (Caldas de Reis). Froján compartiu escenario con bandas como Tregua, Terbutalina ou Boyanka Kostova, ademais de ter realizado unha xira por salas galegas coa banda pontevedresa Liberad al Kraken.

Froján

Froján é o quinto dos sete artistas programados para este verán neste ciclo de música en directo ao aire libre. Como todas as actuacións dos Solpores da Rebullón, o público pode acceder de balde, presenciar o concerto e, ao remate, apoialo abonando a cantidade que lle pareza xusta.

Logo dunha semana de parón pola ponte do 15 de agosto, o seguinte concerto dos Solpores levará o nome de Todas las Batallas Perdidas, o 22 de agosto, antes de que Jay & The Smoking Machines poñan o punto e final ao festival co seu rock clásico e enérxico.

A Sala Rebullón

Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga

A Comunidade de Montes Veciñais en Man Común de Tameiga (Mos) é unha entidade sen ánimo de lucro que aglutina a máis de 400 familias comuneiras e xestiona actualmente 90 hectáreas de superficie forestal para conseguir beneficios medioambientais, sociais, enerxécticos e económicos para a súa veciñanza. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m³de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con máis de 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a CMVMC de Tameiga desenvolve unha intensa actividade sociocultural, a través da organización do festival infantil Miúdo Fest e da programación do CSCD As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.