Tameiga e a plataforma Ulloa Viva alíanse para celebrar o primeiro festival na defensa da terra

Esta fin de semana, festival na Rebullón en beneficio da plataforma Ulloa Viva contra Altri

Seis bandas súmanse ao I Festival Salvamontes, con abonos desde 15€, un evento solidario para xuntar fondos cos que apoiar a loita

A plataforma e Tameiga únense pola terra e os recursos naturais contra os grandes proxectos que os ameazan: o GS360 e Altri

Antes, mañá mércores, única parada en Galicia da xira europea de Evergrey, a mítica banda sueca de metal con 30 anos de carreira

Mos, 12 de novembro de 2024.- Esta fin de semana, a sala Rebullón acolle un festival musical solidario en beneficio da plataforma Ulloa Viva, na súa loita contra a implantación da celulosa portuguesa Altri. O I Festival Salvamontes vaise celebrar este venres e sábado, cun total de seis bandas sobre o escenario.

Os abonos para os dous días do festival están á venda desde só 15 euros en anticipada –10 euros a entrada dun día–, online ou na cantina do CSCD As Pedriñas. Na billeteira, os prezos serán de 13 euros por unha xornada, 18 polas dúas. Os beneficios logrados co festival serán doados integramente á organización cidadá.

O I Festival Salvamontes xurde como resposta á ameaza de desenvolvemento de sendos macroproxectos económicos e comerciais cun elevado impacto en áreas naturais, ambos co apoio da administración autonómica. No caso da Comunidade de Montes de Tameiga, o GS360 que promove o grupo GES da familia Mouriño, tamén propietaria do Real Club Celta; en Palas de Rei, a celulosa portuguesa Altri.

Ambos proxectos non cumprían os requisitos para a súa implantación, así que a Xunta pretende declaralos como proxectos de interese estratéxico para Galicia, evitando así o cumprimento das leis e facilitando a expropiación do solo para as grandes empresas.

A implantación de Altri causaría un deterioro significativo e irreversible á auga do río Ulla e dos ecosistemas dependentes, mentres que o GS360 secaría os acuíferos que abastecen a 5.000 persoas de Mos. Por outro lado, no tocante ao impacto na masa arbórea, suporía a proliferación do eucalipto na Ulloa e en Galicia, e a devastación de máis superficie forestal na área de Vigo, tan necesaria sobre todo en zonas periurbanas.

Tanto Tameiga como a plataforma Ulloa Viva comparten a súa defensa dun modelo económico compatible co respecto ao patrimonio ambiental galego, á paisaxe e á biodiversidade, ao tempo que rexeitan o desenvolvemento de dous proxectos industriais de dubidosa legalidade tendo en conta as directivas ambientais europeas, que ademais afectarían gravemente ao noso medio ambiente e aos recursos naturais dispoñibles para a veciñanza.

O cartel
Os concertos comezarán ás 21 horas. Este venres, 15 de novembro, actuarán Tiam GZ, Flow do Toxo e Willow GHZ. Tiam GZ é rap, reivindicación e pura festa. Desde o dembow á muiñeira, ningún ritmo se lles escapa. Nos seus directos, os da comarca de Chantada misturan a súa identidade rapeira cunha sesión de DJ, coa que van construindo unha homenaxe á nosa terra.

Flow do Toxo, grupo integramente feminino, presentan o seu primeiro traballo, “Aquí están as que ghritan”, un berro persoal e colectivo desde o rural, co rap como forma de reivindicación directa e sen complexos. Música para pasalo en grande.

Willow GHZ é o pseudónimo de Darío Burgo, un dos artistas emerxentes máis interesantes da escena musical urbana en Galicia. A súa música move entre o trap, e o hip hop. Natural de As Neves tamén é o cantante da banda Keixa.

Ao día seguinte, o sábado 16, outras tres formacións subiranse ao I Festival Salvamontes pola defensa da terra. O Leo de Matamá é coñecido polo seu estilo irreverente, mesturando rock, punk e influencias da cultura popular galega, con temas humorísticos e satíricos, sempre con toques de retranca galega. O Leo combina o humor con mensaxes que buscan facer reflexionar.

Sun Iou é a gran promesa e revelación do rock&roll en galego. Procedentes do barrio vigués de Teis, a banda está a presentar o seu primeiro traballo, “Agora”, lanzado este mesmo ano, unha coidada mestura de rock&roll e tradición con engaiolantes harmonías vocais.

Por último, os composteláns Ruxe Ruxe, clásicos e referentes da escea rock e punk galega, con preto de trinta anos de exitosa traxectoria. Este ano, a banda ofreceu varios concertos en Irlanda nos que presentou temas do seu próximo e agardado traballo.

Cartaz do I Festival Salvamontes

Mañá mércores, Evergrey
Único concerto en Galicia da mítica banda Evergrey, con tres décadas de fulgurante traxectoria musical e novo traballo, “Theories Of Emptiness”, que está a presentar nunha xira europea. En España, só actuarán en Barcelona, Madrid, Valladolid, Vitoria-Gasteiz e na sala Rebullón, mañá mércores 13, ás 19 h, con entradas desde 25 euros online e na cantina do CSCS As Pedriñas, no pub Transylvania e no Honky Tonk.

Os suecos Evergrey son coñecidos polo seu enérxico power metal progresivo, con máis dunha ducia de discos publicados desde 1995. Á Rebullón chegarán acompañados por dúas bandas convidadas: Klogr e Virtual Symmetry. Klogr é unha formación de metal alternativo italo-americana, con influencias do metal progresivo, que acaba de lanzar un novo sinxelo: “Face the Unknown”. En segundo lugar, a banda italo-suíza Virtual Symmetry, tamén metal progresivo, presentará en directo avances do seu cuarto disco de estudio, “Veils of Illumination”, que verá a luz o próximo mes.

Cartaz Evergrey

A sala Rebullón
Xestionada pola Comunidade de Montes de Tameiga, a sala Rebullón converteuse en só seis anos nunha referencia para os espectáculos escénicos e musicais en Galicia. Vén de alzarse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 persoas que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de costo. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os costes de producción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.