Six Legged Elephant: Sangue nova para recuperar o rock alternativo vigués

Os Solpores da Rebullón volve unha semana máis cunha nova cita cultural, apostando pola música en directo, as artistas locais e o encontro comunitario.
Six Legged Elephant promete unha mezcla de música estraña e difícil de imaxinar!

Mos, 20 de agosto de 2025.-

O ciclo cultural Os Solpores da Rebullón aproximase ao seu remate coas dúas últimas citas do mes de agosto. Seguindo coa filosofía das propostas, continuamos cunha aposta por bandas emerxentes, sendo neste caso unha banda viguesa de recente creación que ven con fame de comerse o escenario exterior do CSCD As Pedriñas (Tameiga, Mos). Despois dun intenso comezo de mes no que nos visitaron Three Soul, Quique Gómez & Curro Serrano, Anxo Araújo e por último The Brooklyn Gorillas, afrontamos o remate do ciclo coas mesmas ganas de música e de espectáculo que o primeiro día.

Six Legged Elephant é unha banda viguesa de rock alternativo formada no 2024 e que tras a publicación do seus primeiros EP e o seu primeiro videoclip "Awfull", está neste 2025 en pleno proceso de gravación de novos temas. A súa música e letras abordan temáticas sociais e existenciais, como o arrepentimento, a adicción, a angustia ou a esperanza. Ao igual que no concerto anterior e para aproveitar mellor a luz do día e a maxia do solpor, este concerto levarase a cabo ás 20:30h o vindeiro xoves 21 de agosto.

Con esta iniciativa, Os Solpores da Rebullón continuan consolidándose en agosto como unha cita imprescindible do verán na comarca, apostando pola cultura de proximidade, a música en directo e os encontros comunitarios.

SIX LEGGED ELEPHANT

O nome Six Legged Elephant representa algo estraño e difícil de imaxinar, ao igual que a súa mestura de estilos e sons.

A cor rosa é a súa preferida e lévana con orgullo. É unha cor que non debería existir de forma natural; é o resultado da suma que anula unha parte do espectro, e os humanos somos unha das poucas especies que podemos velo. Representa perfectamente o son da banda: esa suma de estilos que se anulan entre si para crear algo novo defínenos moi ben.

A súa traxectoria comeza no 2024 cando a banda complétase coa formación definitiva. Ese mesmo ano lanzan o seu primeiro videoclip e os dous primeiros sinxelos en plataformas dixitais. Xa neste 2025 póñense nas mans do Estudio 21 gramos para a gravación de 4 temas en directo.

De cara a finais deste ano pretenden sacar novas cancións e acumular máis concertos cos que gañar experiencia e dar espectáculo a partes iguais.

O seu son se move entre o rock alternativo, a música emo, o stoner rock, o grunge e outros estilos, con referencias a bandas como Queens of the Stone Age, Nothing but Thieves, La Dispute ou Tigercub.

O resultado é un directo enérxico, caótico e emocional, que conecta con públicos de distintas escenas e idades.

A Sala Rebullón
Xestionada pola Comunidade de Montes de Tameiga, a Sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Este ano volveu a alzarse co Premio Martín Códax da Música 2025 á mellor sala de concertos, segundo a votación dos socios e socias de Músicas ao Vivo, recoñecemento que xa ganara no 2023.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.