A banda alemá Nativo chega o sábado á Rebullón coa súa fusión de estilos única

A banda alemá Nativo chega o sábado á Rebullón coa súa fusión de estilos única

Nativo sobresae como banda crossover que fusiona reggae, funk, rock, cumbia, hip hop e incluso música árabe
Actúa o sábado 31 ás 21 horas, xunto coa banda ourensá TanDuB, con entradas desde só 10 euros en anticipada
O domingo, 1 de xuño, ás 20h, a Rebullón recibe ao grupo extremeño Sanguijuelas del Guadiana, con acceso por billeteira inversa

Mos, 28 de maio de 2025.- A xira conxunta “Soy Tour” de Nativo e os ourensás TanDuB desembarca este sábado, 31 de maio, ás 21 horas na sala Rebullón, unha noite de música fusión para gozar en vivo.

Nativo é unha banda Crossover que fusiona diferentes xéneros musicais, tales como o reggae, o funk, o rock, a cumbia, o hip hop e ata a música árabe, creando así un son único e característico.

Creada en Kiel (Alemaña), Nativo trata aspectos sociais nas súas cancións, como a importancia de preservar e manter unha conexión coa natureza e o entendemento intercultural. Desta forma, a banda ofrece ao público un espectáculo en directo cheo de enerxía e baile, “unha festa consciente”, en verbas dos propios integrantes de Nativo.

O grupo vén á Sala Rebullón acompañado de TanDuB, un proxecto que fusiona a música tradicional gnawa (do norte de Marrocos) con outros xéneros como o reggae, o drum&bass ou a electrónica. Mesturan instrumentos clásicos dunha banda, a electrónica e instrumentos tradicionais marroquís, como o hajhouj ou as carcabas, para lograr un son moi característico que non deixa indiferente a ninguén.

Durante os concertos, o proxecto musical de TanDuB compleméntase cunha pintura que fai en directo un dos cantantes. Os seus compoñentes son músicos experimentados con raíces moi dispares (folk, rock, blues, electrónica), que proveñen de grupos como Lamatumbá, Dar Gnawa, Coanhadeira, Kondiós ou Tabú.

O dobre concerto de Nativo xunto a TanDuB terá lugar este sábado, 31 de maio, a partir das 21 horas na Sala Rebullón. As entradas xa están á venda, na cantina do CSCD As Pedriñas e tamén online, desde 10 euros en anticipada ou 13 na billeteira.

NATIVO + TANDUB

Sanguijuelas del Guadiana

Ao día seguinte, o domingo 1 de xuño, a Sala Rebullón ofrecerá a actuación dos extremeños Sanguijuelas del Guadiana, unha aposta pola autenticidade e o compromiso vital coa música.

A orixe da banda está en tres amigos, Carlos, Juan e Víctor, que aos seus vinte e poucos anos de idade decidiron dar forma e nome a esas reunións con instrumentos que de mozos facían por diversión.

Criados en plena Siberia Estremeña consumen a súa infancia xogando nas rúas, facendo casas de palets, participando nas festividades locais e tendo un primeiro contacto coa música na banda municipal do seu pobo, Casas de Don Pedro. Estas experiencias espertaron neles unha paixón pola música, que evolucionou cara a tardes enteiras interpretando á súa maneira temas de Extremoduro, Triana, Estopa e Nirvana, entre outros.

Logo de probar sorte en cidades como Cáceres ou Madrid, decidiron regresar ao seu pobo cun propósito firme: solidificar a súa formación como grupo, dedicarse a compoñer, comprometerse seriamente co proxecto e ensaiar intensamente.

Sanguijuelas del Guadiana é o resultado dese regreso ás raíces, unha aposta pola autenticidade e o compromiso coa súa música e os seus soños. O resultado, este domingo 1 de xuño ás 20 horas na Rebullón, con acceso por billeteira inversa, co que o público abonará ao remate a cantidade que considere xusta polo espectáculo.

SANGUIJUELAS DEL GUADIANA

A sala Rebullón
Xestionada pola Comunidade de Montes de Tameiga, a sala Rebullón converteuse nunha referencia para os espectáculos escénicos e musicais en Galicia desde a súa inauguración no ano 2017. Alzouse co Premio Martín Códax da Música 2023 á mellor sala de concertos, segundo a votación dos socios e socias de Músicas ao Vivo.

A Rebullón é un proxecto cultural centrado fundamentalmente nos concertos, pero no que tamén se programan sesións de cinema, danza ou teatro, conferencias, actividades infantís ou presentacións de libros. A súa versatilidade é unha das principais características deste espazo, configurado e definido por técnicos profesionais para lograr unha acústica e funcionalidade apta para acoller ao mellor da escena cultural galega.

A Comunidade de Montes de Tameiga
A Comunidade de Montes Veciñais en Man Común de Tameiga (Mos) é unha entidade sen ánimo de lucro conformada por máis de 400 familias que xestiona actualmente 90 hectáreas de superficie forestal veciñal para conseguir beneficios medioambientais, sociais e económicos para a poboación. O seu obxectivo principal é a defensa e protección do patrimonio común.

Xestiona os recursos acuíferos do territorio en beneficio da veciñanza comuneira e dispón dunha comunidade enerxética que reparte 350 pedidos anuais de 3 m3 de biomasa cada un, a prezo de custe. Ademais, a entidade é titular dun viveiro de empresas e do polígono industrial de Monte Faquiña, con 20 naves industriais, que conta con instalacións fotovoltaicas que permiten un autoconsumo individual, abaratando os custes de produción e mellorando a competitividade das empresas.

Por outra banda, a Comunidade de Montes de Tameiga desenvolve unha intensa actividade sociocultural, a través da organización do festival infantil Miúdo Fest e da programación do Centro Sociocultural As Pedriñas e da Sala Rebullón. Tamén colabora con organizacións deportivas, educativas e sociais do municipio.

Versión web

En cumprimiento do disposto na Lei Protección de Datos, para o exercicio dos seus dereitos de acceso, rectificación, cancelación e oposición ao tratamento dos seus datos personais, contidos nas nosas condicións de protección de datos, só ten que responder a este e-mail indicando o seu email no asunto, ou ben a través do envío de un correo ordinario a la dirección: Avd. Rebullón 23. Se desexa darse de baixa tamén pode premer aquí.