Mos, 14 de maio de 2026.- Como xa é habitual, a CMVMC de Tameiga celebra o aniversario da Sala Rebullón cunha xornada aberta á comunidade, un día enteiro de festa, con música para a cativada, xantar popular e concertos de noite na rematar a romaría. 

 

Será no CSCD As Pedriñas este sábado, 16 de maio, a partir das 13 horas. Será entón cando comece a sesión vermú da man de Filloas, que chega en formato showcase ao escenario exterior e cun novo EP baixo o brazo que presentará no aniversario. Filloas é un artista de pop urbano en galego que destaca pola súa proposta bailable e enérxica cun son que se move entre o tecno, o pop, o punk e a electrónica. Filloas demostrará por que é unha das sensacións da música galega recente. 

 

A continuación, dará comezo o xantar popular co tradicional porco ao espeto (con bocadillos por só catro euros) e de tarde, a partir das 17 horas, unha das principais novidades do aniversario deste ano. Tameiga integra neste evento dous espectáculos para público infantil e familiar do Miúdo Fest, o festival para persoas de mediana estatura que chega xa á décima edición. 

 

Así, tamén no escenario exterior das Pedriñas, e con acceso de balde, ás 17 horas actuará Peter Punk. É un dos artistas máis recoñecidos polo seu estilo irreverente e próximo, sempre combinando xogos, acrobacias e gags musicais nun espectáculo cheo de ritmo e interacción constante co público

 

Ás 18 horas, Cé Orquestra Pantasma, o proxecto unipersoal do vigués César Freiria, músico autodidacta e apaixonado dos instrumentos, que leva anos percorrendo a xeografía galega con máis de cento cincuenta concertos anuais nos mellores festivais e festas do país. No seu espectáculo, este “home orquestra” repasa toda a música popular —desde a tradicional ata o punk— nun repertorio versátil e cheo de referencias, capaz de animar tanto a cativada como ás persoas adultas cunha posta en escena única.

 

Ás 19 horas, A Banda da Balbina achegará a súa mestura de música popular con arranxos frescos e festivos. O grupo traballa cun cancioneiro propio no que se entrelazan o humor, o espírito de festa e unha sonoridade moderna, pensada para que o público poida gozar, bailar e cantar xunto á banda.

 

Así remata a programación de tarde e tamén as actividades de balde no escenario de exterior das Pedriñas. Pola noite, a festa pasa ao interior, á Sala Rebullón, con tres artistas desde só 12 euros na venda online e na billeteira para bailar e pechar a romaría por todo o alto. 

 

El Nido presentará a súa proposta de folk contemporáneo, un universo sonoro entre a verbena moderna, a xota e a praza, no que a tradición dialoga cunha produción actual e coidada. Liderada polo vocalista Nacho Prado, a banda burgalesa constrúe cancións que falan da vida cotiá e das emocións humanas, cun directo moi expresivo no que a percusión, as cordas e os arranxos acústicos crean unha atmosfera potente e poética á vez.

 

Guezos achega desde Ourense un rock‑pop‑folk moi aberto, no que as melodías e harmonías propias do folk galego se mesturan coa forza do rock, a frescura do pop e ritmos que van da rumba ao reggae. Cun repertorio cheo de enerxía, o grupo enche de calor os corazóns do público e garante baile, coros e celebración colectiva arredor da nosa música. 

 

O peche da festa correrá a cargo de DJ Chega na hora, un habitual de prazas e festivais en Galicia e no norte de Portugal, onde leva a súa mestura de música tradicional, folc portugués e ritmos de raíz pensados para o baile. Co seu estilo festivo e popular, os seus sets convértense nunha sesión continua de danza comunitaria, perfecta para alongar a noite da Romaría entre muiñeiras, folclore e grooves.